الأسئلة المتكررة

جمعنا هنا الأسئلة اللي تسقسيهم زبوناتنا كل يوم في الهاتف وفي واتساب: على التوصيل، الدفع، استعمال المنتجات، والإرجاع. إذا ما لقيتيش جوابك، اكتبيلنا في واتساب ونجاوبوك.

وقتاش توصلني الطلبية؟

عادة من يوم إلى 3 أيام بعد الطلب وتأكيده. المدة تتعلق بطريقة التوصيل: عندنا موزعين خاصين ببيولينا في عدد من المدن الكبرى، ونوصلو ثاني عبر ياليدين.

توصلو لولايتي؟

إيه، نوصلو لـ 58 ولاية. التوصيل يكون إما عبر موزعي بيولينا، أو عبر خدمة التوصيل ياليدين. كل الخطوات مشروحة في صفحة الشحن والتسليم.

شحال سعر التوصيل لولايتي؟

بعض الباقات والعروض فيها توصيل مجاني، ماشي كل الطلبيات، لذلك شوفي تفاصيل العرض ولا اسقسينا في واتساب.

توصلو خارج الجزائر؟

حالياً شركات الشحن اللي نخدمو معاها توصل داخل الجزائر فقط. إذا حبيتي طلبية لخارج البلاد، اكتبي لفريقنا في واتساب: نحسبو وزن المنتج ونسقسيو وكلاء الشحن الدوليين على السعر، لأنهم ماشي مسجلين في المتجر حالياً.

وين راهي طلبيتي؟ كيفاش نتبعها؟

ابعثيلنا في واتساب رقم الهاتف اللي طلبتي بيه، ونقولولك وين وصلت طلبيتك.

كيفاش نخلص؟

الدفع كاش عند الاستلام: ما تخلصي والو وقت الطلب، تخلصي كي توصلك الطلبية. كل التفاصيل في صفحة طرق الدفع.

نقدر نحل الطلبية قبل ما نخلص؟

إيه، تقدري تحلي الطلبية قبل ما تخلصي وتتأكدي من المنتجات بعينيك. إذا لاحظتي أي مشكل، كلمينا مباشرة في واتساب.

نحب نطلب كمية كبيرة، كاين تخفيض؟

إيه، نوفرو توصيل الكميات الكبيرة، وكاين تخفيض يوصل من 10 إلى 20٪ على بعض المنتجات. تواصلي معنا عبر صفحة اتصل بنا واسقسي على الكمية والتخفيض.

واش منتجات بيولينا أصلية؟

بيولينا علامة جزائرية تأسست سنة 2019 في البويرة. كل منتجاتنا مسجلة، وتمر بتحاليل فيزيائية وكيميائية واختبارات جودة.

كيفاش نستعمل المنتج؟

طريقة الاستعمال مكتوبة في صفحة كل منتج. إذا عندك أكثر من منتج وما عرفتيش الترتيب، مثلاً سيروم فيتامين C مع منتج عرق السوس، اكتبيلنا في واتساب ونرتبولك روتين الصباح والليل. وتلقاي نصائح الروتين في المدونة.

بشرتي حساسة، واش يناسبني المنتج؟

اقرئي المكونات قبل، وجربي المنتج على مساحة صغيرة (خلف الأذن ولا في الذراع) وانتظري 24 ساعة. إذا حسيتي بحرقان، حكة ولا احمرار، وقفي الاستعمال واغسلي بالماء، وإذا ما راحش استشيري طبيب. وتقدري تبعثيلنا نوع بشرتك في واتساب باش نوجهوك.

نورمال للحامل ولا المرضعة؟

كل منتج عندو مكوناته. اقرئي المكونات واعرضيها على طبيبك قبل ما تبداي، خاصة في الحمل والرضاعة، وديري تجربة على مساحة صغيرة من البشرة قبل الاستعمال.

شحال باش تبان النتيجة؟

تختلف من بشرة لأخرى، وتتعلق بنوع المشكل وبقداش عندو، وبالاستعمال المنتظم. ما نوعدوكش بنتيجة في عدد أيام محدد: المهم تستعملي المنتج كل يوم كيما مكتوب، ومع واقي الشمس في النهار إذا كان مشكلك لي طاش ولا الكلف.

جربت كلش وما لقيتش نتيجة، علاش نجرب بيولينا؟

نفهموك، بزاف من زبوناتنا قالولنا نفس الكلمة. منتجاتنا عناية تجميلية وماشي علاج طبي، وما نوعدوكش بمعجزة. قوليلنا في واتساب واش جربتي من قبل، ونختارو معاك روتين بسيط يناسب بشرتك.

نقدر نرجع ولا نبدل المنتج؟

إيه. الإرجاع خلال 3 أيام والتبديل خلال 7 أيام من تاريخ الشراء، بشرط يكون المنتج في حالته الأصلية وفي غلافه الأصلي. الشروط الكاملة في سياسة الاستبدال والاسترجاع.

وصلني منتج فيه عيب مصنعي، واش نعمل؟

ابعثيلنا في واتساب تصويرة المنتج مع المدينة، العنوان ورقم الطلبية. إذا اتفقنا على إرجاعه بسبب عيب مصنعي، قيمة المنتج ما تتحسبش عليك، أما مصاريف الشحن وإعادة الشحن فتتحسب على الزبونة حسب سياسة الاسترجاع.

مازال عندك سؤال؟ اكتبيلنا في واتساب، ولا اتصلي بينا: 0770664549 – 0770637696 – 0799536593 – 0770790779. وتلقاي كل طرق التواصل في صفحة اتصل بنا.